آية ابراهيم تكتب: بس يا ستى وانسحبت بهدوء!
قالهالى ببساطة جدا بعد ما حكالى على تفاصيل كتير كانت ما بينهم، يمكن مكانش حب واضح و صريح لكن التفاصيل نفسها مكنش ينفع تكون حاجة غير ما بين اتنين بيحبوا بعض..
سيبته يكمل كلامه؛
- " أصل لو كنت فضلت معاها كانت هتتعلق بيا زيادة و أنا عارف إن أخرتها مش هتكون النهاية السعيدة الى بتحلم بيها، أنا عارف نفسي و عارف إنى مش هقدر أكمل و مش عارف هحتاج كام سنة كمان عشان أقدر أدخل في علاقة مريحة مفيهاش أى خدوش من الماضي، أنا يمكن أكون حبيتها لكن مش حب من الى ممكن يكمل..أنا مخترتهاش هى جت في طريقى و جت في وقت أنا فيه مش متزن نفسيا غصب عنى كان لازم أحب اهتمامها بيا..كان هى الشخص الى بديله من طاقة حبي و اهتمامى الى مبقتش عارف أوديه فين..أصل احنا منعرفش نعيش من غير ما نحب ولا نتحب من غير ما نحس اننا لينا لازمة في حياة حد حتى لو كان شعور مؤقت..
أيوة شعور مؤقت!!
- طب لما انت عارف انه شعور مؤقت قربت منها ليه؟
اديتها كل الحب دة ليه..؟!
- أنا و هى ظروفنا كانت زى بعض خارجين من قصص فاشلة احنا الاتنين متباعين و مش عارفين نثق في مخلوق..المشكلة ان العلاقة بينا مكانش ليها مسمى لاحنا مرتبطين ولا بنتعامل صحاب
كل الحكاية شوية اهتمام و عارفة كانت ايه النتيجة أنا أهو زى ما انتى شايفة لا قادر أهتم بحد و لا عايز حد يهتم بيا..و لا عايز حد ف حياتى اصلا..حتى هى زى ما تكون زهقت و دايما حاسة إن فيه حاجة ناقصة و أنا مش عارف أكمل النقص دة..انا حتى نسيت الحب و المشاعر الحقيقية عاملين ازاى من كتر العلاقات المزيفة الى بقيت شايفها حواليا لدرجة إنى مبقتش عارف أنا عايز ايه بالظبط..و ملقتش قدامى غير حل من اتنين إما إنى أكمل و أنا حاسس بخنقة و زيف طول الوقت أو إنى أنسحب بهدوء..فانسحبت بهدوء.
- كل دة و تقولى هدوء!!
سابنى و مشي و سابلى تفكير كتير و أسئلة ملهاش اجابات!
ووقفت عند كلمة علاقتنا ملهاش مسمى و افتكرت إن الكلمة دى مش غريبة عليا، حتى من فترة انتشر بوست على سبيل الضحك كان بيقول "المفروض يكون فيه علاقة اسمها أنا مش فاهم ايه الى بيحصل دة"!
وفضلت أسأل نفسي يا ترى الاهتمام دافع كافى يخلينا نتورط في علاقات مزيفة و أشباه حب أو حتى صداقات مؤقتة تنتهى بمجرد شعور الطرف التانى بالإرهاق من العلاقة دى..
طب هو الاهتمام أهم و لا الحب؟!
طب لو الحب هو الأهم ليه بنسيب الى بنحبهم لو مهتموش بينا، و نروح لناس تهتم بينا حتى لو مش متأكدين إن دة حب..
طب يا ترى لحظات الاهتمام القليلة الى ممكن يهديها لينا أى عابر سبيل في حياتنا تستاهل إننا نرهق قلوبنا و نضحى بطاقتنا وشغفنا و صدق مشاعرنا..
صحيح الاهتمام شيء مهم و مهم جدا كمان مش بس بين الى بيحبوا بعض لكن بين الصحاب و الأهل،
لكن بردو دة مش مبرر لكم العلاقات المزيفة الى بقيت أشوفها حواليا الأيام دى في جيل على ما يبدو إنه اتحرم من الاهتمام و الوعى كمان..
احنا جيل عنده طاقة كبيرة و أحلام كتير ينقصنا بس نلاقى حد يشاركنا دة، محتاجين العلاقات الى حوالينا و الى في حياتنا تكون مظبوطة و مترتبة في أماكنها الصحيحة عشان منجيش في نص الطريق نحس إن روحنا بتتسحب مننا و طاقتنا بتخلص و يكون السبب في دة علاقات صداقة و حب مزيفة بتاخد من روحنا و روح الطرف التانى..و ساعتها هنلاقي نفسنا مضطرين ننسحب بهدوء على حد قولنا لكن الانسحاب دة مش هيكون مصحوب بهدوء اطلاقا دة هيكون هو السبب إننا نأذي بعض نفسيا و نكمل باقي الوقت بنحاول نتعافى من التعلق و الذكريات بدل ما نكون مشغولين بأحلامنا و شبابنا الى بيضيع من غير ما نحس..مش بس كدة دة احنا هنفضل في دايرة مقفولة من العلاقات محورها الاحتياج و بس..
كنت فاهمة إن الى بيحصل دة ممكن يكون مجرد مشاكل فردية و بس لكن اكتشفت إنها مشكلة جيل بحاله ناقصه وعى إلا من رحم ربي، كنت بسأل نفسي ليه بحس بخنقة ناحية علاقات معينة أنا أصلا مش طرف فيها بس لقيت إنه أى حاجة مش موجودة في مكانها بتسببلى خنقة و طاقة سلبية و يأس رهيب و لأن أحيانا بيكون عندى خلفية إن العلاقات دى مبنية على مجرد احتياج مش مشاعر صادقة دون وعى من الطرفين طبعا،
موصلتش لإجابة غير إن الاهتمام المؤقت دة زى المسكن مبيعالجش التعب لكن بيسكنه بس و لفترة قصيرة ..و إن الواحد لازم يفكر ألف مرة في الدافع الحقيقي ورا وجوده ناس معينة في حياته..
الخلاصة يعنى؛
اتأكدوا من صدق علاقتكم بالى حواليكم واهتموا بالناس الى بتحبوهم عشان ميمشوش و يسيبوكوا فجأة..
اهتموا بصحابكم واحضنوهم واشبعوا من بعض عشان أيام شبابنا الى هتروح مش هترجع..
وأخيرا يعنى لأهالينا؛ اهتموا بينا صح عشان منحسش باحتياج للدفا و نحس إننا ناقصنا حب و ندخل في دايرة ضيقة أخرتها عقد نفسية بنطلعها على بعض.
