كاترين لويس تكتب: «يا تتعلم يا تعلّم هي عليك!»
السنة اللي فاتت كتبت بوست وقولت فيه إن السنة دي (٢٠١٦) كانت أصعب سنة عليّ..وكمّلت بالدروس اللي اتعلمتها وكدة..
البوست طلعلي في on this day وقرأته..
ومع إن كان في نيّتي أكتب حاجات اتعلتمتها السنادي إلا إن لما قرأت البوست انتباهي اتلفت لحاجة جديدة خالص!
البوست مكتوب فيه إن ٢٠١٦ كانت اصعب سنة..بس أنا كنت ناوية أكتب في البوست الجديد إن السنة دي (٢٠١٧) كانت أبشع سنة بالنسبالي!! صدقني كانت أبشع من ٢٠١٦
وهنا أكتشفت إن كل ما بنكبر الحياة بتصعب..والصعوبة مش معناها إنها بتبقي أوحش..لا..هي بس بتشد حيلها علينا..ولما سألت نفسي ليه؟ لاقيت الإجابة في باقي البوست!
باقي البوست مكتوب فيه الدروس اللي اتعلمتها في ٢٠١٦..وأنا لما أتعلمت اللي أتعلمته كبرت وباقيت أشطر وعندي خبرة في الحياة وبالتالي جه وقت تطبيق اللي اتعلمته.. ووقت التطبيق هو أصعب وقت..زي بظبط أنت خلاص عرفت "حبوا أعدائكم" بس وقت ما تيجي تطبّق..عيش بقي يا بطل!
السنة كانت بشعة عشان كدة..عشان بطبق! السنة اللي فاتت فهمت اللي اتعلمته..و السنة دي اتعلمت اللي فهمته..
ماهو مش كل اللي بيفهم بيتعلم.
اللي عايزة اقوله إن الحياة هتفضل في صعوبة متصاعدة وبأكد إن الصعوبة دي مش معناها إنها وحشة...لا صدقني..بالعكس! اللي بيعرف يعوم؛ الموج هيبقي محبب علي قلبه، غير اللي بيبلبط كلابي هيترعب ويغرق في شبر مياه..يعني كل ما تتعلم من اللي فات كل ما هتبقي أقوي والصعب اللي جي هيبقي سهل عليك وتعرف تعديه بحرفنة؛ لكن لو أنت عايش مجرد سنين بتمُر مرور الكرام وأنت مش مركز فيها ولا مركز مع نفسك كل ما الحياه هتفضل تعيد عليك نفس الدرس لغاية ما يا تتعلم يا تعلّم هي عليك.
بشكر ٢٠١٧ جداً علي كل جديد علمتهولي وكل قديم عادتهولي بشكرها علي صعوبتها وعلي بشاعتها الحلوة اللي خلتني أقوي من قبل كدة. بشكر الناس اللي ضايقوني قبل اللي فرحوني لأنهم علموني أزاي مضايقش حد ولا استهين بزعله...علموني أزاي أحب نفسي وأقدّرها ولفتوا أنتباهي لنقط ضعف فيّ..بشكر كل واحد ساعدني ووقف جنبي وفرّحني..انتوا كنتوا المنفذ ليّ في وقت الضيق..بشكر ربنا علي وجوده الدائم رغم بُعدي عنه معظم الوقت ولأنه علمني أزاي وسط الضيق أشوف رسائله واتعلم؛ بدل ما أتذمر عليه وعلي حالي.
وأحب أختم بنفس القطعة اللي ختمت بيها بوست السنة اللي فاتت:
سنين كتير حلوه عدت..بس عملت بيها إيه و لا هي عملت ليّ إيه؟؟ ولا حاجه!
كل اللي اتعلمته كان من أصعب سنه! ويمكن دي من اهم الحاجات اللي اتعلمتها.. إن مش كل الصعب وحش و مش كل اللي بيوجعك بيشوّهك!
بالعكس!
