أنديانا خالد تكتب: نصائح خفيفة فى تلك الايام اللطيفة!
ملاحظات البسيطة من رحلة معاناة يومية مع "دولة" مترو الانفاق من اجل ارتياح وسلام نفسي وسكينة ومشوار بلا "بهدلة" :
1ـ - حضر فكة فى جيبك علشان ماتوقفش طابور التذاكر وراك مستنى سعادتك وانت بتعد باقى ال 200 جنيه من الصراف وبتقاوحه علشان ترجع له خمسة جنيه طرفها الشمال معووج ومش جاية على مزاجك .
2ـ - لما تيجي تركب استنى اللى نازل لما ينزل لان ممكن انت تستنى المترو اللى بعده انما هو مش هاينفع ينزل المحطة اللى بعدها .
3ـ لما تيجي ترد على ابن عمك اللى قاعد فى الكويت مش لازم تجعر وتعلى صوتك على الاخر وتحكى له على تفاصيل ولادة مرات ابن عم مرات خال ست ابوك لان محدش ملزم يسمع كل الكلام الفاضى ده ، اتكلم على قدك ولو هو مش سامعك انشالله عنه ما سمعك .
4ـ - لو قادتك الاقدار انك تقف وتستند على الباب اللى مش بيفتح افرش نفسك لان المكان ده يساع نفرين نفر لكل باب بس هاتلاقى غالبا واحد رذل جه اتحشر وعايز يقف تالت .
5ـ وانت بتتكلم فى موبايلك وايدك الشمال اللى ماسكة الموبايل جنب الشباك ، امسك الموبايل كويس لان ممكن حرامى ينتشه من ايدك والمترو واقف على الرصيف .
6ـ لو معاك طفل خليه قبل منك فى الطلوع والنزول لان المترو ممكن يقفل عليه وانت زى العبيط مش واخد بالك من عيالك.
7 - خلى دايما فى جيبك او شنطتك زجاجة برفان صغيرة لان ممكن الصدفة تقودك ان واحد يغمى عليه ، او واحد يطلع بشنطة سمك تقلب كيان معدتك والعربية .
8 - ماتعطفش على شحات فى المترو لانه غالبا مش شحات ومتودك على كده لو حاولت تنفعه ممكن تندم لانك هاتسمعه فى الموبايل بتاعه وهو بيربط على بناء الدور ال11 فى العمارة بتاعته .
9 - الكنبة بتشيل 8 انفار ، فماتبقاش تنح وتخليها تشيل 6 علشان حضرتك تبقي مفرشح رجليك وقاعد ولا على بالك ، وبرضه ماتخليهاش تشيل 9 بالعافية وتعكنن عليهم .
10 - ماتقفش تحت المروحة ودايما خليك مراقبها لانها ساعات كتير بتقع وممكن تنزل على دماغك تفتحها .
11 - الست الحامل لها قدسيتها ، اظن مفهومة كده .
12 - للبنات : لو لقيتى متحرش زبالة ماتسكتيش ولمى عليه العربية .
13 - الافضل ليك لو معاك مراتك او خطيبتك ركبها عربية السيدات اامن ليها رغم الرغى اللى فيها بس اهو احسن من اى بحلقة فيها .
14 - لو حصل وحد داس على جزمتك بدون قصد سامحه يا سيدي مش لازم تورى له انك ابن القنصل وانه داس على الجزمة الشريفة ، سامحه لان غالبا هاتقوم خناقة بينكم وتجعروا فى وش بعض وتهددوا بعض وهاتنزل على مفيش لاننا “زياطين”.
15- مش لازم تشغل موبايلك بعلو صوته بقرآن كريم او ترانيم ، اسمع على قدك لان محدش ملزم يسمع حتى لو كان هدفك نشر الفضيلة ، لان غالبا بنسبة كبيرة هدفك المنظرة .
16 - ماتقعدش على الكرسيين القلاب اللى جنب الباب لان امة لا اله الا الله هاتيجي تتسلبط وتقف قدامك ، ولما تيجي تقوم لهم يقولوا لا خليك وهما فى الاساس ممكن يشتموك بابشع الالفاظ فى سرهم لو ما قمتش .
17 - العيال الرذلة اللى غاوية تلعب عقلة فى المترو مالكش دعوة بيهم لانهم غالبا مش متربيين أو غالبا برضه مش متربيين فاقصر الشر واعمل انك مستمتع واضحك وعديها .
18 - لو حبيت تعدى من وا واحدة واقفة ، اوعى ترقق صوتك وتقول لو سمحتى لانها غالبا هاتكون مش سامعاك وهاتبص لك بتكبر رهيب وهاتميل لك شوية عشان تعدى ، خلى صوتك خشن جاعورة ” بعد اذنك يا ابلة ” هايوسعوا لك رجالة وستات.
19 - ماتحاولش تتنح للى متنح لك خصوصا مترو كراسي العزا لانك ممكن تزهق وتقلب بخناقة وبرضه هايفضل متنح لك .
20 - اعمل حسابك فى مناديل كتير فى شنطتك لانك غالبا ممكن حظك ييجي جنب ست وراجل بيفرجوا عيالهم من الشباك وسايبينهم يلمعوا جزمهم فى بنطلونك مع كلمة بس يا حبيبي باردة .
21 - وانت باصص فى موبايلك ولقيت راس محشورة معاك وبتبص ، حاول تقلب له كل القنوات ، او هات له حاجة حرشة يتفرج عليها لان الوقت طويل وهو مضطر لده بدل ما يتنح لوشوش الناس ، او بص له بقرف هايسيبك فى حالك .
22 - ماتحاولش تعمل فيلسوف وتدى آراءك للناس وتتمنظر بالفاظ : ” الشعب المصرى هو كده ” ” ما كلهم حرامية ” ” ماحنا لو نبطل سرقة ” ” لان غالبا انت نفسك حرامى ، قول ربنا يهدى الحال واتكتم.
23 - ماتحاولش تتكلم فى السياسة وتحلل وجهات النظر الاستراتيجية للاتجاه القومى المنغلق فى اللامتناهى المصرى ، لانك مش هاتخلص وفى الغالب هاتطلع “فستك” .
24 - ثقافة الشكر بتزيد المودة والالفة ... يعنى لو معاك امراة شايلة طفل او زوجتك حامل وحد قام لها مش هايضرك فى حاجة انك توجه له كلمة شكر بسيطة لان ده هايشجعه ويشجع غيره يعمل كده ..
25 ـ على العكس عدم الشكر بيزيد الغتاتة والتناحة والتطنيش ..... مش هايضرك فى حاجة كلمة شكرا لحد احترم ادمية زوجتك او والدتك او اختك.
