جروبات بيع الشقق والعقارات .. سمسار أون لاين
كتبت ـــ أنديانا خالد
"عندك شقة .. اعرضها على النت"
كلمات سائدة لدى البعض الان ، واصبحت وسيلة سهلة وغالبا مضمونة للكثيرين فى الحصول على شقة مناسبة لامكانياتهم المادية او لتحقيق طموحاتهم فى سكن فاخر او متشطب او حتى على الطوب .
جروب هنا وجروب هناك وجروب لكل منطقة يحتوى على الاف الشقق والبيوت والعمارات والاراضي الخاصة المطروحة للبيع ، فما على صاحب الشقة الذى يرغب فى البيع سوى ان ينشر" بوست" بمواصفات الشقة ومكانها ومساحتها وتشطيبها ويرفقه بصور لها ، وكانك انتقلت للمعاينة، فتكون قد كونت فكرة لا باس بها عن الشقة ، وتقرر البدء فى السؤال عن السعر والتفاوض.
وغالبا ما يكون السعر على الخاص "انبوكس" منعا لدخول السماسرة الى عملية التفاوض على البيع و"تكسير" ثمن الشقة ، لان العارض يرغب بالطبع فى تحقيق اعلى سعر للبيع .
يقول تامر حسن محاسب:" كنت امتلك شقة متشطبة والحمد لله بعتها بعد ما نزلت عنها بوست فى الجروب بحوالى اسبوع" .
وتقول هند سميح ربة منزل :" كنت ببيع شقتى وقلت السمسار هاياخد منى فلوس كتير ، نزلتها على النت ، ومنعت توسط السماسرة ، والحمد لله بعتها بعد شهر باقل من السعر اللى كنت طالباه بحاجات بسيطة" .
فيما يري الحاج رشوان "سمسار" بمنطقة عين شمس، ان السمسار اضمن لانه بيبقي ضامن ان مافيش "نصب"، واى تلاعب سهل ترجع ليه ، اما النت فممكن تدفع فلوسك فى حاجة وتطلع فى الاخر " نصب".
ويقول الحاج سمير على صاحب عقار بشارع الاربعين بعين شمس :" ابتديت البناء ، وبعد كده ابتديت انزل مواصفات الشقق وهى على الطوب ، على جروب الفيس بتاع المنطقة ، مع التسهيلات فى السداد ، والحمد لله خلصت العمارة كلها وفاضل فيها كام شقة فاضيين واغلب اللى جه اشترى جه عن طريق النت" .
ويكون نموذج طلب الشراء مثل:" عايز شقه لا تقل عن 110 متر متشطبه وتكون مترخصه والدور من الثاني حتي الخامس وبها مرافق والسعر كاش" .
ويكون نموذج البيع :"شقة تمليك سوبر لوكس للبيع من شارع ... متفرع من ...... ، المساحة 140 متر صافي ، الوصف متشطبة سوبر لوكس (3 غرف وحده مفتوحة على الصالة و حمام و مطبخ ) - فيها عداد كهرباء الكتروني - في غاز في الدور الخامس يعني اللي عاوز يدخله سهل ، الدورالسادس لا يوجد اسانسير ، المطلوب 250 الف وممكن تفاوض للجادين".
وينظم قواعد الجروب الادمن كما هو متعارف عليه فى اغلب جروبات الفيس بوك ، الا انه يضع ضوابط صارمة واكثر دقة .
مواضيع مشابهه