أحمد عز يكتب: نادى القرن المظلوم
منذ عام 2000 حتى اليوم وقصة اختيار الاهلى نادى القرن لها ردود افعال فى الوسط الاعلامى الرياضي حتى اليوم وجمهور الزمالك لديه بعض الاسانيد التى يستند عليها.
1) كيف اكون اكبر نادى من حيث عدد البطولات الافريقية والاهلى يتحصل على اللقب وفى نفس الوقت فى الاولمبياد الميدالية الذهبية بتساوى الف فضية
2) حتى لو تم احتساب نادى القرن عن طريق عدد النقاط فكيف يتم التساوى بين بطولة ابطال الكاس وابطال الدورى وعدم احتساب نقاط الافرواسيوى
3) هل هناك جهات تجامل الاهلى فى كل شئ داخل الاتحاد الافريقي
ردى انا كاهلاوى على كل نقطة وبالمنطق برضوا
1) احنا بنلعب كرة القدم تحت مظلة اتحادات رياضية وليست اللجنة الاولمبية...يعنى لو المبدا الذى يقول ذهبية واحدة افضل من الف فضية فهدا مبدئيا غلط وانت فى الكلية لما تجيب امتياز فى مادة وتكون ساقط فى الباقي هل دا معناه انك افضل من اللى جاب جيد فى كل المواد طبعا لا نرجع بقا للاتحادات الرياضية العالم كله ماشي بنظام النقاط دا اذن الاتحاد الافريقي مخترعش العجلة يعنى بالدليل انه من كام سنة بلجيكا كانت مصنف اول على مستوى العالم وهولندا كمان مع انهم ماخودش كاس عالم ولا بطولة اوروبا مشفناش بصراحة كلام من عينة المانيا وايطاليا ان فيه شبه مجاملة للمنتخبات دى وكمان مصر دخلت قبل كدا وخدت التاسع على العالم مع انها اساسا موصلتش كاس عالم ساعتها مسمعناش المنتخبات الافريقية اعترضت يعنى
2) اللقب دا يسمى نادى القرن الافريقي ولا نادى القرن لدورى الابطال اكيد نادى القرن الافريقي فالاهلى كان واخد بطولات اكتر من الزمالك كعدد ازاى الاهلى واخد 6 بطولات كبيرة والزمالك 5 يعنى ايا الزمالك التفوق العددى بتاعه دا كان بسبب بطولات السوبر المختلفة اللى هى بطولة الماتش الواحد فكيف 4 بطولات من ماتش واحد تتساوى ب 4 بطولات ابطال كؤوس اللى كل بطولة فيها 10 ماتشات فازاى انت عايز تساوى ابطال الكؤوس بالسوبر طيب هيتقال لماذا الاتحاد الافريقي ساوى بين ابطال الدورى وابطال الكؤوس هيقولك كان ساعتها عدد المباريات واحد وحتى لو الاتحاد الافريقى زود نقطة فى عدد النقاط اللى تخص ابطال الدورى هيفضل الاهلى متفوق ايضا طب حتى لو تم احتساب كمان بطولة الافرواسيوى الاهلى والزمالك يتساوى واستحالة الزمالك يتفوق
3) الاتحاد الافريقي مجاملش الاهلى وكان ممكن يقولك ان الفرق اللى خدت بطولات افريقيا من الستينات لسنة اقامة اول سوبر افريقي ليهم نقطة زيادة عشان ملعبوش السوبر كنوع من انوع تكافؤ الفرص وكدا هيكون ادى الحق لاندية زى مازيمبى مثلا عشان ليه تاريخ فى الستينات والاهلى فى الثمنينات ولك ان تتخيل ان جيل الخطيب افضل اجيال الاهلى ملعبش ولا سوبر فلو كان لعب 5 سوبر كان هياخد 3 على الاقل او ان يحسب البطولات المحلية فى المعيار وكدا هتكون مجاملة فعلا لان الاهلى مكتسح محليا
4) الاهلى هو اكتر نادى فى العالم تم ظلمه على المستوى القارى 5 بطولات دورى ابطال خسرهم بسبب التحكيم الافريقي اعوام 2017،2011،2010،2007،1983 باخطاء تحكيمية واضحة للعيان فاين مصطفي فهمى وشطة من كل ذلك؟
- الاهلى انسحب من بطولات الاتحاد الافريقي فى التسعينات فلماذا لما يصفى مصطفى فهمى الاجواء بين الاهلى والاتحاد الافريقي؟
- الاهلى لعب بطولة السوبر الافريقي فى 2007 فى اثيوبيا ولما يلعبها فى القاهرة وكان حقه بحجة الاحتفال بتاسيس الاتحاد الافريقي فاين مصطفي فهمى ولماذا لما يجعل السوبر فى القاهرة؟ مع العلم ان مصر من مؤسسين الاتحاد الافريقي
- الاهلى لما اخذ لاعبه محمد بركات انذار فى ذهاب نهائى 2007 امام النجم الساحلى وكان انذار ظالم وكان الانذار التانى وطلب رفع الايقاف والاتحاد الافريقي رفض مع ان نفس الواقعة حصلت مع احمد بلال فى 2004 مع المنتخب واترفع الايقاف واترفع ايضا الايقاف عن الحاج ضيوف فى 2002 وايضا طاهر ابوزيد فى 1986 فاين مجاملات مصطفي فهمى وشطة وعمرو شاهين؟
- اكتر حكم ظلم الاهلى فى بطولات افريقيا كان العرجون وعلى الرغم من ذلك لم يتم ايقافه على الرغم من اخطاءه الذى يشهد عليها القاصي والدانى بل حكم بعد مباراة النجم الساحلى بشهرين مباراة الكاميرون وغانا فى نص نهائي امم افريقيا 2008 فلو مسئولين الاهلى لديهم الحظوة بالشكل التى يصدره لنا الاعلام الابيض كان امروه بحكم قوة نفوذهم كما يزعم البعض ان يحكم ماتشين فى الادوار الاولى
5)سؤال لجمهور الزمالك العريق هل حقيقي يفرق معاكم لقب نادى القرن ولا لان النادى الاهلى هو اللى خده يعنى لو الزمالك وصيف لكوتوكو ولا الترجى كان سيثار هذا الموضوع حتى اليوم؟ ولا كانت ستقام الاحتفالات بهذا الانجاز؟!!
